2021 թվականի դեկտեմբերի 10-ին «Բարձր տեխնոլոգիաների և ռազմավարական պլանավորման կենտրոն» հիմնադրամը նախաձեռնել է հեռուստամարաթոն՝  «Կանգնի՛ր Արցախի կողքին» խորագրով։ Հեռուստամարաթոնի ընթացքում հավաքագրված ֆինանսական միջոցներն ուղղվել են բիզնես և շահույթ չհետապնդող ծրագրերի ֆինանսավորմանը, ինչպես նաև հաստատվել են գործարար կապեր տարբեր կազմակերպությունների հետ, որոնք պատրաստ են երկարաժամկետ համագործակցության։ Այդպիսի կազմակերպություններից է Ամերիկայի հայկական ազգային անվտանգության ինստիտուտը (ԱՀԱԱԻ), որի հիմնական նպատակներից է նպաստել Հայաստանի և Արցախի Հանրապետությունների ինքնիշխանությանը, անկախությանը և պաշտպանությանը։

Ծանոթանալով 2020 թվականի 44-օրյա պատերազմից հետո Արցախում ծագած խնդիրներին՝ ԱՀԱԱԻ-ի տնօրենների խորհուրդը որոշում է կայացրել 25 000 ԱՄՆ դոլար գումար հատկացնել Ստեփանակերտ քաղաքի կենտրոնական զինվորական հոսպիտալին՝ անհրաժեշտ բժշկական պարագաների ձեռքբերման համար։ Հիմնադրամը, որպես նպատակային ֆինանսավորման միջնորդ և երաշխավոր, նշված գումարը փոխանցել է համապատասխան կառույցի կողմից տրամադրված հաշվեհամարին։

Համայն հայության ջանքերի շնորհիվ մեզ կհաջողվի դիմակայել նոր ժամանակների մարտահրավերներին, որի վառ օրինակներից մեկն է տվյալ համագործակցությունը:

Մանրամասն տեղեկությունների համար կարող եք կապ հաստատել Հիմնադրամի հետ։