Տվյալ նախագիծն իրենից ներկայացնում է գրաֆիկ դիզայնի ոճով կազմված գիրք, որի հեղինակն է Դիանա Աբրահամյանը։ Դիանան մեկ տարի է ինչ ուսումնասիրում է այս ոլորտը և միաժամանակ աշխատում ԹՈՒՄՈ ստեղծարար տեխնոլոգիաների կենտրոնում՝ որպես մարզիչ։

Գիրքը բաղկացած կլինի 30-40 էջից և իր մեջ կընդգրկի Արցախի մասին խոսող նկարներ ու պատկերազարդումներ (իլյուստրացիա), քանի որ պատկերը միակ լեզուն է, որը հասկանալի է բոլորին։ Գրքում ներկայացվելու է Արցախի ողջ կոլորիտն իր յուրօրինակ աշխարհով: Այն իր վերջնական տեսքը կստանա աջակցելուց 5 ամիս անց, որից հետո ծրագրի հեղինակը պլանավորում է իր նախագիծը ներկայացնել օնլայն հարթակում, որպեսզի ցանկության դեպքում հետաքրքրվողները կարողանան պատվիրել: Գրքի հետագա վաճառքի արժեքն իր մեջ կներառի նաև տպագրության ծախսերը, իսկ հասույթի մնացած գումարը կուղղվի այն ծրագրերի աջակցմանը, որոնք կնպաստեն Արցախի զարգացմանը:

Դիանայի մտահղացումն իրականացնելու համար անհրաժեշտ է պլանշետ մատիտով (Apple Pencil), որի ֆունկցիաների օգնությամբ նա կկարողանա օգտվել Adobe Illustrator, Adobe Photoshop և Procreate ծրագրերից: Վերջինս  հնարավոր է ներբեռնել միայն App store հարթակից:

Աջակցելով տվյալ ծրագրին՝ բոլորին հասկանալի լեզվով միասին գրի ենք առնում և ներկայացնում ամբողջ աշխարհին Արցախի պատմությունը, մշակույթն ու ավանդույթները։ 

Ծրագրի իրագործման համար հստակ գումար սահմանված չէ, քանի որ այն կախված է Apple ապրանքատեսակի պլանշետի և մատիտի մոդելից։ Ծրագրում նշված է միջին արժեքը։